Sunday, 16 December 2012

കുത്തിക്കുറിപ്പ്

 
ഇനി എഴുതുന്നില്ല എന്നു ഞാന്‍ തീരുമാനിച്ചു.
എഴുതുന്നത്  ദളിത്‌-വിരുധമായാലോ?
ഒരു വെറും സവര്‍ണ്ണന്റെ കോപ്രായങ്ങളായി ഞാന്‍ എഴുതിയത് വ്യാഖ്യാനിക്കപ്പെട്ടാലോ ?
ഞാന്‍ ഒരു കമ്മ്യൂണിസ്റ്റ്‌ ആണെന്ന്  വായിക്കുന്നവര്‍ ചിന്തിച്ചാലോ ?
ഞാന്‍ എഴുതിയതിന്റെ ശരിയായ അര്‍ഥം -- ഞാന്‍ ഉദ്ദേശിക്കാന്‍ ഉദ്ദേശിച്ച, അവര്‍ കണ്ടെത്തിയ ശരിയായ അര്‍ഥം -- ഇതാണെന്നു പറഞ്ഞ് വായനക്കാര്‍ എന്റെ മഷിക്കുപ്പി പൊട്ടിച്ചാല്‍ ?
ഇനി അത്രയൊന്നുമായില്ലെങ്കില്‍ പോലുംബുദ്ധിജീവികളുടെ പോസ്റ്റ്‌മോര്‍ട്ടം ടേബിളില്‍ വച്ച് തലനാരിഴ കീറി പരിശോധിക്കുമ്പോള്‍ എന്റെ രചനകള്‍ വെറും കുട്ടിത്തങ്ങളായിപ്പോയാലോ ?
ഹോ! ഓര്‍ക്കാന്‍ വയ്യ!

കാര്യങ്ങള്‍ വളച്ചുകെട്ടി, ആര്‍ക്കും മനസിലാവാത്ത വിധത്തില്‍ പറഞ്ഞാല്‍ ഒരു ഗുണമുണ്ട് .
വായിക്കുന്നവരാരും "ഇതെന്താ?" എന്നു ചോദിക്കില്ല. നാണക്കേടല്ലേ?
ഒപ്പം, നമുക്ക് "Intellectual" എന്ന ലേബലും പതിച്ചു കിട്ടും.

വേണ്ട. കീറാമുട്ടി കണക്കുള്ള നിഗൂഢമായ വാചകങ്ങള്‍ മെനയാന്‍ എനിക്കറിയില്ല.
ലളിതമായി കാര്യങ്ങള്‍ പറയുവാനാണ്  എനിക്കിഷ്ടം.
പക്ഷെ അങ്ങനെ എഴുതിയാല്‍ ആര് വായിക്കാന്‍ ?
ഇനി വായിച്ചാല്‍ തന്നെ അവര്‍ പറയും : "You are a very shallow person." എനിക്കൊട്ടും ആഴമില്ലെന്ന് . പരപ്പും.

കുറച്ച് വായിക്കാന്‍ ശ്രമിച്ചു. കാമുവും സാര്‍ത്രും ദസ്തയവസ്കിയും ഗോര്‍ക്കിയുമെല്ലാം. മൊത്തമായി ദഹിച്ചില്ലെങ്കിലും കുറേ വാനരചേഷ്ഠകളെ തിരിച്ചറിയാന്‍ കഴിഞ്ഞു. അത്രയും സമാധാനം.

ഇങ്ങനെയൊക്കെ ആയതിനാല്‍, കണ്ണടച്ചുകൊണ്ട്  കണ്ട് , കാതുപൊത്തിക്കൊണ്ട്  കേട്ട്, വാമൂടിക്കൊണ്ട് പറഞ്ഞ്, കിട്ടുന്നതെല്ലാം വിഴുങ്ങി, കുറേ ശര്‍ദ്ദിച്ച്, കുറേ പാതി ദഹിച്ചു, യാത്ര തുടരാം. പേന തൊടാതെ.

എല്ലാവര്‍ക്കും നല്ലത് വരട്ടെ.

മംഗളം 

3 comments:

  1. This comment has been removed by the author.

    ReplyDelete
  2. finally you're able to turn the mirror :)

    ReplyDelete
  3. Turn the mirror? Didn't quite get that.

    ReplyDelete